Fröllutollur verndar ekki neitt – Alþingi getur afnumið hann eins og snakktollinn

Hæstiréttur hefur komist að þeirri niðurstöðu að ríkinu sé heimilt að leggja 76% toll á franskar kartöflur. Innflutningsfyrirtækin Innnes og Hagar töpuðu í dag málum þar sem látið var reyna á þetta Íslandsmet í tollheimtu, en tollurinn á franskar kartöflur er hæsti prósentutollur í íslensku tollskránni.

Ríkið hélt því fram fyrir dómi að tollurinn væri ætlaður til almennrar tekjuöflunar og fullyrti að tollurinn væri ekki verndartollur fyrir innlenda framleiðslu. Í málsvörn ríkisins komu hins vegar ekki fram neinar skýringar á því hvers vegna tollurinn væri svona hár eða hvers vegna franskar kartöflur ættu að vera tekjulind fyrir ríkið umfram aðrar vörur. Hæstiréttur komst að þeirri niðurstöðu að ákvörðun um þessa tollheimtu rúmaðist innan fjárstjórnarvalds íslenska ríkisins.

„Niðurstaðan er að sjálfsögðu vonbrigði og allur málflutningur íslenska ríkisins í þessu máli er afar öfugsnúinn,“ segir Ólafur Stephensen, framkvæmdastjóri Félags atvinnurekenda. „Þessi tollur hefur áratugum saman verið rökstuddur sem verndartollur, en er núna allt í einu fjáröflunartollur. Hér liggur nú fyrir dómur Hæstaréttar sem  fastbindur þessa afstöðu íslenska ríkisins og frá henni verður því ekki horfið. Tollurinn verndar einfaldlega ekkert. Það þýðir það eitt að Alþingi er í lófa lagið að afnema þennan toll, rétt eins og 59% toll á snakk sem var aflagður fyrir rúmu ári með tilheyrandi hagsbótum fyrir neytendur. Það sama á við um þessa tvo tolla; þeir vernda enga innlenda landbúnaðarframleiðslu og eru fyrst og fremst vernd fyrir innlenda iðnaðarframleiðslu, sem notar að stórum hluta innflutt hráefni.“

Dómur Hæstaréttar í máli Innness gegn íslenska ríkinu