Viðskiptasendinefnd frá Hebei-héraði í Kína heimsótti í morgun Íslensk-kínverska viðskiptaráðið, sem hýst er á skrifstofum Félags atvinnurekenda. Yfirvöld og fyrirtæki í Hebei, sem er 70 milljóna manna hérað umhverfis höfuðborgina Peking, hafa áhuga á auknum viðskiptum við Ísland.
Á meðal fyrirtækja í sendinefndinni er Chengde KuangGang Supermarket Group, en forsvarsmenn þess fyrirtækis hafa áhuga á að flytja inn bæði sjávarafurðir og landbúnaðarvörur, einkum kjötvöru, frá Íslandi.
Chengde Yaou Nuts & Seeds er einn stærsti framleiðandi Kína á hnetum, möndlum og fræjum ýmiss konar og leitar markaða á Íslandi og víðar.
Þá er í sendinefndinni fulltrúi Hebei Shuikang Seat Co., en það fyrirtæki framleiðir sæti fyrir íþróttaleikvanga, leik- og kvikmyndahús og til fleiri nota.
Áhugasamir geta nálgast frekari upplýsingar um viðskiptasendinefndina og einstök fyrirtæki hjá skrifstofu FA.
